Auenture von den Nibelungen. /

UNS IST In alten mæren. /   w[u]nders vil geseit.
von heleden lobebæren.   von / grozer arebeit.
von frevde unde hochgeciten /   von weinen vnde klagen.
von kvner rec/ken striten.   mvget ir nv w[u]nder horen sa/gen.
Ez w[u]hs in Bvregonden.   ein vil edel / magedin.
daz in allen landen.   niht schoners / mohte sin.
Chriemhilt geheizen.   div wart / ein schone wip.
dar vmbe mvsin degene. /   vil verliesen den lip.
Ir pflagen dri kuni/ge.   edel unde rich.
Gunther unde Gernot.   die / rechen lobelich.
vnde Giselher der iunge.   ein wetlicher degen.
div frowe was ir swe/ster.   die helde hetens in ir pflegen.
Ein richiv chuniginne.   frov^[1] Vte ir mvter / hiez.
ir vater der hiez Dancrât.   der in div erbe liez.
sit nach sime lebene.   ein ellens / richer man.
der ovch in siner iugende.   grozer eren vil gewan.
Die herren wa/ren milte.   von arde hoh erborn.
mit kraft v[n]mazen chvne.   die rechen vz/erchorn.
da zen Bvrgonden.   so was ir lant genant.
si frvmten starchiv w[u]n/der.   sit in Etzelen lant.
Ze Wormze bi dem Rine.   si wonten mit ir chraft. /
in dienten von ir landen.   vil stolziv ritterschaft.
mit lobelichen eren.   vnz / an ir endes zit.
si sturben iæmerliche.   sit von zweier frowen nit. /
Die dri kunige waren.   als ich gesaget han.
von vil hohem ellen.   in waren / vndertan.
ovch die besten rechen.   von den man hat gesaget.
starch vnde / vil chvo^[2]ne.   in scharpfen striten vnverzaget.
Daz was von tronege hagene. /   vnde ovch^[3] der bruder sin.
Danchwart der snelle.   von Metzzen Ortwin.
die zwene / Marcgrauen.   Gere vnde Ekkewart.
Volker von Alzeye.   mit ganzem ellen wol be/wart.
Rvomolt^[4] der chvchen meister.   ein vzerwelter degen.
Sindolt vnde Hvnolt. /    dise herren mvsin pflegen.
des hoves vnde der eren.   der drier kunige man. /
si heten noch manigen rechen.   des ich genennen nienen kan.
Danchwart / der was marschalch.   do was der nefe sin.
Trvhsetzze [des] kuniges.   von mezzen / Ortwin.
Sindolt der was schenche.   ein wetlicher degen.
Hvnolt was chame/[Bl. 1v]rære.   si chunden hoher eren pflegen.

Von des hofes ere.   vnde von ir witen chraft. /
von ir vil hohen werdekeit.   vnde von ir ritterschaft.
der die herren pflagen.   mit / frevden al ir leben.
des enchunde iv ze ware.   niemen gar ein ende geben. /

[1] Sonderzeichen: v über o.
[2] Sonderzeichen: o über v.
[3] Sonderzeichen: o über v.
[4] Sonderzeichen: o über v.