Nibelungen-Handschrift C

Blatt 40^v
Str. 1059,1 - 1072,1

Blatt 41^r
Str. 1072,1 - 1083,4

Nibelungen-Handschrift C / Blatt 40v / JPG-Format klein

Nibelungen-Handschrift C / Blatt 41r / JPG-Format klein

Blatt 40^v
Str. 1059,1 - 1072,1

1059,1: Do sp/ra\ch ab/er\ Chriemh' nv dolt mit mir die not
1059,2: do chom/en\ dise beide da si in funden tot
1059,3: Gernot ir bruder vñ Giselh/er\ daz kint
1059,4: in triwen si in chlageten mit den and/er\en sint
1060,1: Si weinten innekliche den Chriemh' man
1060,2: man solde messe singin zvo dem munster dan
1060,3: giengen allenthalben man <wip> unt kint
1060,4: die sin doch lihte enbaren die weinten Sivriden sint
1061,1: ))G((ernot vñ Giselh/er\ sp/ra\chen swest/er\ min
1061,2: nv troste dich nach tode als ez doch mvoz nvo sin
1061,3: wir wellens dich ergezzen die wil unt wir gelebn
1061,4: done chunde ir trost decheinen zer w/er\lde niem/en\ gegebn
1062,1: Sin sarch d/er\ was bereitet vmbe/n\ mitten tac
1062,2: man hvb in von d/er\ bare da er vof lac
1062,3: noch enwolde si den rechen lazen niht begraben
1062,4: des mvsen al die lvte vil michel arebeite habn
1063,1: In einen richen pfellel man den toten want
1063,2: ich wæne man da iem/en\ ane weinen vant
1063,3: do chlagete h/er\cenliche Vote ein edel wip
1063,4: vñ allez ir gesinde den sinen wætlichen lip
1064,1: Do man daz gehorte daz man zem munst/er\ sanc
1064,2: vñ in gesarchet hete vil groz wart d/er\ gedranc
1064,3: durch willen siner sele waz opfers rnan do trouch!
1064,4: er hete bi den vinden gvot/er\ frivnde doch genvoch
1065,1: ))D((o man da gote gediente daz volch hvop sich von dan
1065,2: do sp/ra\ch div kuniginne irn svlt niht eine lan
1065,3: mich hinte bewachen den voz erwelten degn
1065,4: ist an sime libe al min frevde gelegn
1066,1: Dri tage uñ dri nahte wil ich in lazen stan
1066,2: vnz ich mich wol geniete mins vil lieben man
1066,3: waz ob daz got gebivtet daz mich ovch nimt d/er\ tot?
1066,4: so wære wol v/er\endet min arm/er\ <Chriemhilde> not
1067,1: Zen herbergen giengen die lvte von d/er\ stat
1067,2: pfaffen uñ mveniche si beliben bat
1067,3: uñ allez sin gesinde daz sin von rehte pflac
1067,4: si heten naht vil arge vñ ovch vil mvelichen tac
1068,1: Ane ezzen vñ ane t/ri\nchen beleip da manic man
1068,2: die ez nem/en\ wolden den wart daz chunt getan
1068,3: man gæb es in den vollen daz schvof Sigemunt
1058,4: do was den Nibelungen michel arebeiten chunt
1069,1: Die drie tagecite so wir horn sagn
1069,2: di da singen <chunden> da si mvsn tragen
1069,3: vil michel arebeite durch ir hercen ser
1069,4: si baten vmbe die sele des rechen chven vñ her
1070,1: ))V((rbor vf der erden div teiltes in div lant
1070,2: swa so man div chloster uñ gvte lvte vant
1070,3: ovch hiez si gebn den armen d/er\ sinen habe genvoch
1070,4: si tet dem wol geliche daz si im holden willen trvoch
1071,1: An dern dritten morgen ze reht/er\ messecit
1071,2: so was bi dem munst/er d/er\ chirchof also wit
1071,3: von den lantlvten weinens harte vol
1071,4: si dienten im nach tode als man lieben frivnden sol
1072,1: In den tagen vieren ist uns

Blatt 41^r
Str. 1072,1 - 1083,4

1072,1: gesagt daz
1072,2: ze drizzech tusint marchen od/er\ dannoch baz
1072,3: wart durch sine sele den arm/en\ da gegebn
1072,4: do was gelegn ringe sin groziv <schoene> vñ ovch sin lebn
1073,1: Do gote wart da gedienet vñ daz man da gesanch
1073,2: mit ungefugem leide vil des volches ranch
1073,3: man hiez in vz dem munster zv dem g/ra\be tragn
1073,4: die sin doch liht enbaren die sah man weinen vñ klagn
1074,1: Vil lvote schriende daz volch gie mit im dan
1074,2: vro enwas da niemen weder wip noch man
1074,3: ê er begrabn wrde man sanch uñ las
1074,4: hey waz d/er\ wisen pfaffen bi siner bivilde was!
1075,1: ))E(( daz zem grabe choeme daz Sivrides wip
1075,2: do ranch mit solhem iamer d/er\ ir getriwer lip
1075,3: daz man si mit wazzer vil diche da begoz
1075,4: ez was ir ungemvete hart vnmæzlich groz
1076,1: Ez was ein michel wnd/er\ daz si ie genas
1076,2: mit klage ir helfende vil manic frowe was
1076,3: do sp/ra\ch div kuniginne ir Sivrides man
1076,4: ir sult durch iw/er\ t/ri\we dise genade an mir began
1077,1: Lat mir nach mime leide daz chleine liep geschehn
1077,2: daz ich sin schone hovbt noch eines mvze sehn
1077,3: do bat sis also lange mit iamers siten starch
1077,4: daz man wid/er\ vf brechen mvose den herlichen sarch
1078,1: Do brahte man die frowen da si in ligen vant
1078,2: si hvop sin schoene hovbet mit ir wizen hant
1078,3: do chustes also toten den edeln ritter gvot
1078,4: ir vil liehten ovgen vor leide weinten do blvot
1079,1: ))E((in iæm/er\lichez scheiden wart do da getan
1079,2: man trvoch die frowen dannen sine mohte niht gegan
1079,3: do lac in unsinne daz herliche wip
1079,4: vor leide moht ersterben d/er\ ir vil wnnekliche lip
1080,1: Do marn den edeln herren hete nv beg/ra\bn
1080,2: leit ane maze sah man die alle habn
1080,3: die mit im chom/en\ waren von Nibelunge lant
1080,4: vil selten wol gemvten man do Sigemunden vant
1081,1: Do was d/er\ etelicher d/er\ drier tage lanc
1081,2: vor dem starchen leide niht az noch ent/ra\nch
1081,3: doch enmohten si dem libe so gar geswichen niht
1081,4: si nerten sich nach iamer so noch genvogen geschiht
1082,1: Chriemh' unv/er\sunnen in vnchreften lac
1082,2: den tac uñ den abent vnz an den andern tac
1082,3: swaz iem/en\ sprechen chvnde daz was ir gar vnchunt
1082,4: in den selben noeten lage ovch d/er\ kunich Sigemunt
1083,1: Vil chume wart d/er\ herre wid/er\ ze sinnen braht
1083,2: von dem starchen leide chranch was gar sin maht
1083,3: daz enwas niht wnd/er\ do sp/ra\chen sine man
1083,4: herre ir sult ze lande wir mugen niht langer hie bestan

Auenture wie Chriemh' da bestvnt vñ ir sweher dannen reit

Blatt 40^v
Str. 1059,1 - 1072,1

Blatt 41^r
Str. 1072,1 - 1083,4

Adresse
Erbprinzenstraße 15, 76133 Karlsruhe
Postfach 1429, 76003 Karlsruhe
Telefonnummern und E-Mail-Adressen

Öffnungszeiten
Mo - Fr 9.00 - 19.00 Uhr,
Sa 10.00 - 18.00 Uhr

Lesesaal Sammlungen:
Mo - Fr 9.30 - 13.00 Uhr, 14.00 - 16.00 Uhr
Do 9.30 - 13.00 Uhr, 14.00 - 18.00 Uhr