Nibelungen-Handschrift C

Blatt 4^v
Str. 92,3 - 106,1

Blatt 5^r
Str. 106,1 - 119,2

Nibelungen-Handschrift C / Blatt 4v / JPG-Format klein

Nibelungen-Handschrift C / Blatt 5r / JPG-Format klein

Blatt 4^v
Str. 92,3 - 106,1

0092,3: me des roten goldes von Nibelunge lant
0092,4: daz solde in allez teilen des chunen Sifrides hant
0093,1: Do gaben si im ze miete daz Nibelunges sw/er\t
0093,2: si wrden mit dem dienste vil vbele gew/er\t
0093,3: den in da leisten solde d/er\ vil chune man
0093,4: ern kundes niht v/er\enden do wart d/er\ helt von in bestan
0094,1: ))D((en schatz er vngeteilet beliben mvse lan
0094,2: do begunden mit im striten d/er\ zweier kunige man
0094,3: mit ir vat/er\ swerte daz Palmvnch was genant
0094,4: ez streit ab in d/er\ chune den hort vñ Nibelung lant
0095,1: Si heten da ir friunde zwelf chune man
0095,2: die starch als risen warn waz chundez si v/er\van?
0095,3: die slvoch sit mit zorne div Sifrides hant
0095,4: vñ rechen sibenhund/er\t dwanger von Nibelunge lant
0096,1: Dar zv die richen kunige die sluger beide tot
0096,2: er chom von Albriche sit in groze not
0096,3: d/er wande sine herren rechen da zehant
0096,4: vnz er die grozen sterche sit an Sifride vant
0097,1: Done chunde im gestriten daz starche getwerch
0097,2: alsam die lewen wilde si liefen an den berch
0097,3: da er die tarnkappen Albrichæ ane gewan
0097,4: do wart des hordes herre Sifrit d/er\ vil chune man
0098,1: ))D((ie da getorsten striten die lagen alle erslagen
0098,2: den schatz hiez er do balde furen vñ tragen
0098,3: da in ê da namen die Nibelunges man
0098,4: Albrich d/er\ vil starche do die kameren gewan
0099,1: Er mvos im swern eide er dient im so sin kneht
0099,2: all/er\ hande dienste was er im gereht
0099,3: so sp/ra\ch von Tronege Hagene daz hat er getan
0099,4: also grozer chrefte nimere reche gewan
0100,1: Noch weiz ich an im mere daz mir ist bekant
0100,2: einen lintrachen slouch des heledes hant
0100,3: do badet er in dem blvote des ist d/er\ helt gemeit
0100,4: von also vest/er\ hvte daz in nie wafen sit v/er\sneit
0101,1: Nv svln wir den rechen enpfahen deste baz
0101,2: daz wir iht v/er\dienen den sinen starchen haz
0101,3: sin lip d/er\ ist so chune man sol in holden han
0101,4: er hat mit sinen ellen so mænigiv wnd/er\ getan
0102,1: ))D((o sp/ra\ch d/er\ chunich riche dv maht wol haben war
0102,2: nv sich wie degenliche er stet gein strites var
0102,3: er unt die sine degene d/er\ wnd/er\chune man
0102,4: wir suln im begegene hin nid/er\ zv dem rechen gan
0103,1: Daz mvgt ir sp/ra\ch do Hagene wol mit eren tvn
0103,2: er ist von hohem chunne eines richen kuniges svn
0103,3: er stet in d/er\ gebære mich dunchet wizze ch/ri\st
0103,4: ez ensin niht kleiniv mære darvmbe er her geriten ist
0104,1: Do sp/ra\ch der wirt des landes nv si vns willechomen
0104,2: er ist edel uñ chvone daz han ich wol v/er\nom/en\
0104,3: des sol ovch er geniezen in Burgonden lant
0104,4: do gie d/er\ chunic Gunth/er\ da er Sifriden vant
0105,1: Der wirt vñ sine rechen enpfiengen so den gast
0105,2: daz in an ir zvhten wenich iht gebrast
0105,3: des begunde in nigen d/er\ vil chune man
0105,4: man sah in zvhtekliche mit den sinen rechen stan
0106,1: ))M((ich wnd/er\t

Blatt 5^r
Str. 106,1 - 119,2

0106,1: dirre mære sp/ra\ch d/er\ wirt zehant
0106,2: von wanne ir edel Sifrit sit chom/en\ in daz lant
0106,3: od/er\ waz ir w/er\bet ze Wormez an den Rin
0106,4: do sp/ra\ch d/er\ gast zem kunige daz sol ivch vnv/er\daget sin
0107,1: Mir wart gesaget mære in mins vat/er\ lant
0107,2: daz hie bi iv wæren daz het ich gern <erkant>
0107,3: die chunsten rechenn des han ich vil v/er\nom/en\
0107,4: die ie kunic gewnne dar vmbe bin ich her bechom/en\
0108,1: Ovch hort ich iv selben d/er\ degenheite iehen
0108,2: daz man kunic deheinen chun/er\ habe gesehen
0108,3: des giht iv vil d/er\ lute vb/er\ elliv disiv lant
0108,4: nvne wil ich niht erwinden vnz ez mir werde bechant
0109,1: Ich bin ovch reche vñ solde chrone t/ra\gen
0109,2: ich wil daz gern fugen daz si von mir sagen
0109,3: daz ich habe von rehte lute vñ lant
0109,4: darvmbe sol mi/n\ ere vñ min hovbt wesen pfant
0110,1: Nv ir sit so chune als mir ist geseit
0110,2: iane rvche ich ist iemen liep od/er\ leit
0110,3: ich wil an iv ertwingen swaz ir mugt han
0110,4: lant vñ burge daz sol mir wesen allez und/er\tan
0111,1: ))D((en chunic hete wnd/er\ vñ sine man allesam
0111,2: vmbe disiv mære die er hie v/er\nam
0111,3: daz er des hete willen er næme im siniv lant
0111,4: daz horten sine degene do wart in zvernen bechant
0112,1: Wie hete ich daz v/er\dienet sp/ra\ch Gunth/er\ der degen
0112,2: des min vat/er\ lange mit eren hat gepflegen
0112,3: daz wir daz solden vliesen von iemannes k/ra\ft?
0112,4: wir liezen vbel schinen daz ovch wir pflegen ritt/er\schaft
0113,1: Ich enwil es niht erwinden sp/ra\ch ab/er\ d/er\ chune man
0113,2: ez enmvge von dinem ellen din lant den vride han
0113,3: ich wils alles walten vñ ovch div erbe min
0113,4: erwirbestvz mit ellen die svln von rehte wesen din
0114,1: Din lant vñ ovch daz mine suln geliche ligen
0114,2: swed/er\ uns/er\ ein/er\ am and/er\n mac gesigen
0114,3: dem sol ez allez dienen die lute vñ ovch div lant
0114,4: da wid/er\redet aleine d/er\ h/er\re Gernot zehant
0115,1: Wir han des niht gedingen sp/ra\ch do Gernot
0115,2: daz wir iht lande irtwingen daz iemen drumbe tot
0115,3: gelige vor rechen handen wir haben richiv lant
0115,4: div dienent vns von rehte ze nieman sint si baz bewant
0116,1: <))I((n> vil grimme/m\ mvote da stunden die friunde sin
0116,2: do was ovch dar vnd/er\ d/er\ herre Ortwin
0116,3: d/er\ sp/ra\ch disiv svone ist mir von h/er\cen leit
0116,4: iv hat d/er\ starche Sifrit vnv/er\dienet wid/er\seit
0117,1: Ob ir vñ iw/er\ brud/er\ hetet niht die wer
0117,2: vñ ob er danne furte ein michil kuniges her
0117,3: ich trwote wol erstriten daz d/er\ chune man
0117,4: die grozen vb/er\mvote von warn schulden mvse lan
0118,1: Daz zvrnde harte sere der helt von Nid/er\lant
0118,2: sich ensol niht v/er\mezzen wid/er\ mich din hant
0118,3: ich bin ein kunic riche so bistv kuniges man
0118,4: ia enzimt dir niht mit strite deheinen minen genoz bestan
0119,1: Nach swerten rief do sere von Metzen Ortwin
0119,2: er mohte Hagenen swester soun von Tronege vil

Blatt 4^v
Str. 92,3 - 106,1

Blatt 5^r
Str. 106,1 - 119,2

Adresse
Erbprinzenstraße 15, 76133 Karlsruhe
Postfach 1429, 76003 Karlsruhe
Telefonnummern und E-Mail-Adressen

Öffnungszeiten
Mo - Fr 9.00 - 19.00 Uhr,
Sa 10.00 - 18.00 Uhr

Lesesaal Sammlungen:
Mo - Fr 9.30 - 13.00 Uhr, 14.00 - 16.00 Uhr
Do 9.30 - 13.00 Uhr, 14.00 - 18.00 Uhr